“Монголын эдийн засгийн чуулган-2022” – Шинэ сэргэлт уриан дор төрийн ордонд зохион байгуулагдаж байна. Дөрөвдүгээр сарын 07,08-ны өдөр төр, хувийн хэвшил, судлаач, иргэний нийгмийн байгууллагын төлөөллүүд салбар бүрийн тулгамдсан асуудлыг нээлттэй ярилцаж, бүтээлчээр хэлэлцэж байна.

“Эрчим хүчний сэргэлт – үр ашиг, алдагдал” хэлэлцүүлгээр эрчим хүчний салбарыг санхүү, эдийн засгийн хувьд алдагдалгүй, хэрэглээг бүрэн хангаж ажиллах, улс орны эдийн засгийн хараат бус, бие даасан байдлыг бэхжүүлэх хүрээнд “Шинэ сэргэлтийн бодлого”-д эрчим хүчний чиглэлээр тусгагдсан төслүүдийг хэрхэн хэрэгжүүлэх талаар төр, хувийн хэвшил, гадаад дотоодын хөрөнгө оруулагчид, эрдэмтэн судлаачдын олон ургальч санал, шүүмжийг хэлэлцлээ.

Эрчим хүчний эх үүсвэр, цахилгаан, дулаан дамжуулах, түгээх сүлжээний насжилт өндөрсөж, ашиглалтын хугацаа дууссан, нэг хүнд ногдох аваар саатлын тоо нэмэгдэх болсон, дотоодын үйлдвэрлэл, импортын цахилгаан эрчим хүчний чадлын хэмжээ бодит хэрэгцээнээс багассан, хөрөнгийн эх үүсвэрийн дутагдлаас компаниудын засвар, шинэчлэлийн ажлууд бүрэн хийгдэхгүй байгаа зэрэг шалтгааны улмаас эрчим хүчний хэрэглээний өсөлтийг хангаж чадахааргүй эрсдэл тулгараад байна. Иймд эрчим хүчний төслүүдийг хэрэгжүүлэхэд тулгарч буй хөрөнгө оруулалт, санхүүжилтийн хүндрэлтэй байдал, хэрэглэгчийн эрчим хүчний үнэ тарифыг индексжүүлэх асуудлыг хэлэлцэн боломжит шийдэл, гарцыг тодорхойлох шаардлагатай байгаа юм.

Төрөөс эрчим хүчний салбарын санхүүгийн алдагдлыг бууруулах, үр ашгийг дээшлүүлэх, үнэ тарифыг индексжүүлэх зохицуулалтыг хэрэгжүүлэх, гадаад дотоодын хөрөнгө оруулалт татах хууль, татварын тогтвортой, зөв бодлоготой, хувийн хэвшил нь хөрөнгө оруулалтын таатай орчныг бүрдүүлсэн эрх зүйн орчинтой байх нь зүйтэй гэдэг дээр оролцогчид санал нэгдэв.

Мэдээний төрөл: Мэдээ мэдээлэл